Iss Daur ko Bhagat Singh ki Talash Hai!

Iss Daur ko Bhagat Singh ki talash hai

Bhagat Singh ki talash hai–

Talash hai ek aise shakhs ki

Jo hamein need se utha sake

Jo hamari aatma ko jhakjhor sake

Jo hamein Bharat ka matlab bata sake

Jo hamein Azaadi ke maayne sikha sake

Jo hamein swabhimaani bana sake

Muft mein mili thi Swatantrata

isiliye hamne uski ahmiyat ko bhula diya hai

Amar Krantikaariyon ko Lajjit kar diya hai

Unke khoon ko paani kar diya hai

Mar Gaya hai Jazba-Junoon watan ke liye kuch bhi kar jaane ka

Swaarth ke is jeevan mein apne ko bhi apmaanit kar diya hai

Kabhi gaur karna ki kahan jaaoge

Agar apne adhikaaron ke liye awaaz nahi uthaoge

Chahte ho ki desh ki soorat badle par khud uske liye kuch karna nahi chahoge

Kaun badlega halaat jab tum hi aage nahi aaoge

Yeh watan karaah raha hai

Tum to kuch karoge nahi isiliye

Cheekh Cheekh kar Bhagat Singh ko pukar raha hai

Kya uski yeh pukar koi sunega

Kya fir se woh gulaami ki bediyon mein jakda jaayega

Is Daur ko Bhagat Singh ki talash hai

Shaheed Bhagat Singh to ab na aayenge

Is Daur ko apne hi daur ke Bhagat Singh ki talash hai

Intezaar karo uske paida hone ka ya fir ban jaao tum ek aur Bhagat Singh

Nirnay Tumhara Hai, Waqt tumhara hai, Abhimaan Tumhara hai

Aakhir yeh Mulq Tumhara hai……

Logo_Ris

Leave a Reply

Your email address will not be published. Required fields are marked *